ലഹരിക്കെതിരെ താമരശ്ശേരിയിൽ ജനകീയ പ്രതിരോധ കൂട്ടായ്മ നടത്തി

താമരശ്ശേരി:കോഴിക്കോട് റൂറൽ ജില്ലാ പോലീസ് താമരശ്ശേരിയിൽ ലഹരി വസ്തുക്കളുടെ ഉപയോഗത്തിനെതിരെ ജനകീയ പ്രതിരോധ കൂട്ടായ്മ സംഘടിപ്പിച്ചു. കഴിഞ്ഞ രണ്ട് മാസത്തിനുള്ളിൽ ലഹരി ഉപയോഗത്തെ തുടർന്ന് താമരശ്ശേരി പോലീസ് സ്റ്റേഷൻ പരിധിയിൽ മാത്രം സമൂഹ മനസാക്ഷിയെ ഞെട്ടിച്ച കൊലപാതകവും ലഹരി ഉപയോഗിച്ച്കൊണ്ട് സമൂഹത്തിൽ ഉണ്ടായ മറ്റ് ഗുരുതര അക്രമ സംഭവങ്ങളും വർദ്ധിച്ച സാഹചര്യത്തിലാണ് താമരശ്ശേരിക്കൊപ്പം നിന്നുകൊണ്ടു ലഹരിക്കെതിരെ  ജനകീയ പ്രതിരോധ കൂട്ടായ്മ സംഘടിപ്പിച്ചത്.

സമൂഹത്തെ കാർന്നു തിന്നുന്ന വിപത്തായ ലഹരി ഉപയോഗം മൂലം കോഴിക്കോട് റൂറൽ ജില്ലയിൽ മാത്രം നിരവധി വിലപ്പെട്ട ജീവനുകൾ നഷ്ടപ്പെടുകയും അക്രമ സംഭവങ്ങൾ വർധിക്കുകയും ആയതിനെ തുടർന്ന് കുഞ്ഞുങ്ങൾ അടക്കമുള്ളവർ അതിൻ്റെ ദുരന്ത  അനുഭവിക്കേണ്ടി വരികയും ചെയ്ത സാഹചര്യത്തിൽ കോഴിക്കോട് റൂറൽ പോലീസ് 22.02.2025 മുതൽ 06.04.2025 വരെ നടത്തിയ ഓപ്പറേഷൻ ഡി -ഹണ്ടിന്റെ ഭാഗമായി 408 കേസുകൾ രജിസ്റ്റർ ചെയ്യുകയും 425 ഓളം പ്രതികളെ അറസ്റ്റ് ചെയ്യുകയും ചെയ്തു. കൂടാതെ ഈ ഓപ്പറേഷനിലൂടെ 106.354 ഗ്രാം MDMA യും 15688.35 ഗ്രാം കഞ്ചാവും 343 ഓളം കഞ്ചാവ് ബീഡികളും , 14.77 ഗ്രാം മെത്താഫെറ്റമിനും, 1.8 ഗ്രാം ബൗൺഷുഗറും അഞ്ചോളം നൈട്രാസിപ്പാം ടാബ്ലറ്റ്‌സും അടക്കമുള്ള മാരക ലഹരി വസ്തുക്കളും ഒരു കഞ്ചാവ് ചെടിയും പിടിച്ചെടുത്തിരുന്നു . സ്ഥിരം ലഹരി വിൽപ്പനക്കാരായ കുറ്റവാളികളെ നിയമത്തിനു മുൻപിൽ കൊണ്ടുവരാനും കാപ്പ അടക്കമുള്ള വകുപ്പുകൾ ചുമത്തി ജയിലിൽ അടയ്ക്കാനും നാടുകടത്താനും വേണ്ട നടപടികളും ഈ കാലയളവിൽ ഊർജിതമാക്കി.

കോഴിക്കോട് റൂറൽ ജില്ലാ പോലീസിന്റെ നേതൃത്വത്തിൽ സംഘടിപ്പിച്ച ജനകീയ പ്രതിരോധ കൂട്ടായ്മയിൽ ജനമൈത്രി സുരക്ഷ പദ്ധതി, സ്റ്റുഡന്റ് പോലീസ് കേഡറ്റ്സ്, ഹോപ്പ് പ്രൊജക്ട് വിദ്യാർത്ഥികൾ, ആശാ വർക്കർമാർ, എസ്.സി.എസ്.ടി മോണിറ്ററിംഗ് കമ്മിറ്റി പ്രവർത്തകർ, റസിഡന്റ്സ് അസോസിയേഷൻ അംഗങ്ങൾ, കുടുംബശ്രീ, തൊഴിലുറപ്പ് പ്രവർത്തകർ, ലഹരിവിരുദ്ധ കൂട്ടായ്‌മ പ്രവർത്തകർ, ജനപ്രതിനിധികൾ, പൊതുജനങ്ങൾ തുടങ്ങിയവർ പങ്കെടുത്തു .

താമരശ്ശേരി പരപ്പൻപൊയിൽ ഹൈലാൻ്റ് കൺവെൻഷൻ സെൻററിൽ വച്ചായിരുന്നു കൂട്ടായ്മ സംഘടിപ്പിച്ചത്.   തിരുവമ്പാടി എം.എൽ.എ . ലിൻ്റോ ജോസഫ് അധ്യക്ഷത വഹിച്ച ചടങ്ങ് കണ്ണൂർ റേഞ്ച് ഡി ഐ ജി ജി എച്ച  യതീഷ്ടു ചന്ദ്ര lPS ഉൽഘാടനം ചെയ്തു, മുക്കം മുനിസിപ്പൽ ചെയർമാൻമാർ പി ടി ബാബു, വിവിധ പഞ്ചായത്ത് പ്രസിഡൻ്റ്മാരായ ആദർശ് ജോസഫ്, ബിന്ദു ജോൺസൺ, പ്രേംജി ജയിംസ്, നജുമുന്നീസ, അലക്സ് തോമസ്, സാജിദത്ത് സി.കെ, അയ്യൂബ് ഖാൻ, മറ്റു ജനപ്രതിനിധിങ്ങളും സംസാരിച്ചു.

ലഹരിക്കെതിരെ പ്രതിജ്ഞയെടുത്ത ശേഷം താമരശ്ശേരി DYSP സുഷീർ കുമാർ നന്ദി പറഞ്ഞു, തുടർന്ന് ലഹരിക്കെതിരെ വിവിധ കലാപരിപാടികൾ അരങ്ങേറി.