പ്രഭാത വാർത്തകൾ

2025  ജനുവരി 29  ബുധൻ 

1200  മകരം 16   ഉത്രാടം 

1446  റജബ് 28

      

◾  നെന്മാറ ഇരട്ടക്കൊലക്കേസ് പ്രതി ചെന്താമര പൊലീസ് പിടിയില്‍. പൊലീസും നാട്ടുകാരും ചേര്‍ന്ന് ഇന്നലെ രാത്രി ഏറെ നേരം പോത്തുണ്ടി  മട്ടായി മേഖലയില്‍  നടത്തിയ തെരച്ചില്‍ അവസാനിപ്പിച്ച് മടങ്ങിയ ശേഷമാണ് ചെന്താമര പിടിയിലായത്. പൊലീസ് പിന്‍വാങ്ങിയ ശേഷം പോത്തുണ്ടി മലയില്‍ നിന്നുള്ള വഴികളില്‍ പലയിടത്തായി രണ്ട് വീതം പൊലീസുകാരെ വിന്യസിച്ചിരുന്നു. പോത്തുണ്ടി മലയില്‍ ഒളിച്ചിരുന്ന പ്രതി വിശപ്പ് സഹിക്കാനാവാതെ ഇവിടെ നിന്നും വീട്ടിലേക്ക് മടങ്ങും വഴിയാണ് പൊലീസ് പിടിയിലായത്. ഇവിടെ നിന്നും പൊലീസ് പിന്‍വാങ്ങിയെന്ന പ്രതീതിയുണ്ടാക്കിയ ശേഷം തന്ത്രപരമായാണ് പ്രതിയെ പിടികൂടിയത്.

◾  നെന്മാറ ഇരട്ടക്കൊല കേസ് പ്രതി ചെന്താമരയെ എത്തിച്ച നെന്മാറ പൊലീസ് സ്റ്റേഷന് മുന്നില്‍ സംഘര്‍ഷാവസ്ഥ. രോഷാകുലരായ ജനം ചെന്താമരയെ വിട്ടുകിട്ടണമെന്ന് ആവശ്യപ്പെട്ട് പൊലീസ് സ്റ്റേഷനിലേക്ക് ഗേറ്റ് തള്ളിത്തുറന്ന് കടക്കാന്‍ ശ്രമിച്ചു. ഇതോടെ പൊലീസ് ലാത്തിവീശി. പിന്‍വാങ്ങിയ ജനക്കൂട്ടം വീണ്ടും സംഘടിച്ച് തിരികെ വന്നതോടെ വീണ്ടും പൊലീസ് ലാത്തിവീശുകയായിരുന്നു.

◾  ജയിലില്‍ നിന്നിറങ്ങിയ ശേഷം നേരത്തെ പിരിഞ്ഞു പോയ ഭാര്യയെ കൊലപ്പെടുത്തുകയായിരുന്നു തന്റെ ആദ്യലക്ഷ്യമെന്ന്  നെന്മാറ ഇരട്ടക്കൊല കേസ്  പ്രതി ചെന്താമര. പോത്തുണ്ടിയിലെ വീട്ടിലേക്ക് ഭാര്യയെ വിളിച്ചുവരുത്തി വകവരുത്താനാണ് പദ്ധതിയിട്ടതെന്നും പ്രതി പൊലീസിനോട് പറഞ്ഞു. അതേസമയം സജിതയെ കൊലപ്പെടുത്തിയതിലുള്ള പക സുധാകരന് തന്നോട് ഉണ്ടെന്ന് സംശയിച്ചെന്നും സുധാകരന്‍ തന്നെ ആക്രമിക്കുമെന്ന സംശയത്തെ തുടര്‍ന്നാണ് ഇയാളെയും അമ്മയെയും വീട്ടില്‍ കയറി വെട്ടിക്കൊലപ്പെടുത്തിയതെന്നും പോലിസ് ചോദ്യം ചെയ്യലില്‍ ഇയാള്‍ പറഞ്ഞു.

◾  നെന്മാറ ഇരട്ട കൊലപാതകത്തില്‍ വീഴ്ച സംഭവിച്ചെന്ന എസ്പിയുടെ റിപ്പോര്‍ട്ടിന്റെ അടിസ്ഥാനത്തില്‍ നെന്മാറ എസ്എച്ച്ഒ മഹേന്ദ്ര സിംഹനെ സര്‍വീസില്‍ നിന്ന് സസ്പെന്റ് ചെയ്തു. പ്രതി ചെന്താമര ജാമ്യ വ്യവസ്ഥ ലംഘിച്ചിട്ടും കോടതിയെ അറിയിക്കാത്തത് വലിയ പിഴവെന്ന കണ്ടെത്തലിന്റെ അടിസ്ഥാനത്തിലാണ് നടപടി. പൊലീസില്‍ വിശ്വാസം നഷ്ടപ്പെട്ടതായി കൊല്ലപ്പെട്ട സുധാകരന്റെ മക്കള്‍ പറഞ്ഞു.

◾  നെന്മാറ ഇരട്ട കൊലപാതകം സംസ്ഥാനത്തെ പൊലീസ് സംവിധാനത്തിന്റെ തകര്‍ച്ച വ്യക്തമാക്കുന്നതാണെന്ന് പ്രതിപക്ഷ നേതാവ് വിഡി സതീശന്‍. ജാമ്യവ്യവസ്ഥകള്‍ ലംഘിച്ച് നാട്ടിലെത്തിയ പ്രതി ഭീഷണിപ്പെടുത്തിയതു സംബന്ധിച്ച് പരാതി നല്‍കിയിട്ടും നടപടി എടുക്കാത്ത പോലീസ് ഈ കൊലപാതകങ്ങള്‍ക്ക് ഉത്തരം പറഞ്ഞേ മതിയാകൂവെന്നും പ്രതിപക്ഷനേതാവ് പറഞ്ഞു. നാഥരാക്കപ്പെട്ട പെണ്‍കുട്ടികളുടെ സംരക്ഷണം സര്‍ക്കാര്‍ ഏറ്റെടുക്കണമെന്നും കുടുംബത്തിന് നഷ്ടപരിഹാരം നല്‍കാനും സര്‍ക്കാര്‍ അടിയന്തര നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.

◾  എലപ്പുള്ളിയില്‍ ബ്രൂവറി വേണ്ടെന്ന സിപിഐ തീരുമാനത്തോട് പ്രതികരിക്കാതെ എക്സൈസ് മന്ത്രി എംബി രാജേഷ്. ഭൂഗര്‍ഭ ജലചൂഷണം ഉണ്ടാകില്ലെന്ന് ഉറപ്പ് നല്‍കി സിപിഐയെ അനുനയിപ്പിക്കാനാണ് സിപിഎം നീക്കം. അതേസമയം, ബ്രൂവറിയിലെ അനുമതി കൂടിയാലോചന ഇല്ലാതെയാണെന്നതിന്റെ തെളിവുകള്‍ ഇന്ന് പുറത്തുവിടുമെന്നാണ് പ്രതിപക്ഷ നേതാവിന്റെ മുന്നറിയിപ്പ്.

◾  മതിയായ തുകയില്ലാത്തത് വയനാട്ടിലെ വന്യജീവി പ്രതിരോധ സംവിധാനം ഫലപ്രദമാക്കുന്നതിനു തടസ്സമെന്നു പ്രിയങ്ക ഗാന്ധി എം.പി. കേന്ദ്രസര്‍ക്കാര്‍  പണം നല്‍കാത്ത വിഷയം പാര്‍ലമെന്റില്‍ ഉന്നയിക്കുമെന്നും സ്വന്തം നിലക്ക് സിഎസ്ആര്‍ ഫണ്ടുകള്‍ എത്തിക്കാന്‍ ശ്രമിക്കുമെന്നും പ്രിയങ്ക ഗാന്ധി പറഞ്ഞു. പഞ്ചാരക്കൊല്ലിയില്‍ കടുവ ആക്രമണത്തില്‍ കൊല്ലപ്പെട്ട രാധയുടെ സന്ദര്‍ശിച്ച ശേഷം സംസാരിക്കുകയായിരുന്നു പ്രിയങ്ക.

◾  വയനാട്ടിലെത്തിയ പ്രിയങ്ക ഗാന്ധി എം.പിയ്‌ക്കെതിരേ സി.പി.എം. പ്രവര്‍ത്തകരുടെ കരിങ്കൊടി പതിഷേധം. കണ്ണൂര്‍ വിമാനത്താവളത്തില്‍ നിന്നും വരുന്ന വഴി കണിയാരത്തുവെച്ചാണ് പ്രവര്‍ത്തകര്‍ കരിങ്കൊടിയുമായി പ്രതിഷേധിച്ചത്. പ്രശ്നങ്ങള്‍ ഉള്ളപ്പോള്‍ മാത്രമാണ് എം.പി. വയനാട്ടിലെത്തുന്നത് എന്ന് ആരോപിച്ചായിരുന്നു കരിങ്കൊടി പ്രതിഷേധം.

◾  വയനാട്ടില്‍ വന്യജീവി ആക്രമണമടക്കഗ്മുള്ള ഏത് വിഷയമുയര്‍ന്നാലും  സിപിഎമ്മിന്റെ ആക്രോശങ്ങള്‍ ആദ്യമുയരുന്നത് പ്രിയങ്ക ഗാന്ധിക്കെതിരെയാണെന്ന് വി ടി ബല്‍റാം. സംസ്ഥാന ഭരണകൂടത്തില്‍ ഒരു മന്ത്രിയടക്കം ആ ജില്ലയില്‍ നിന്നുണ്ട്. എന്നാല്‍ എംപിയെവിടെ എന്ന് സിപിഎമ്മുകാര്‍ പതിവായി വെല്ലുവിളിക്കും. എംപി സംഭവസ്ഥലത്ത് വന്നാല്‍ അവരെ റോഡ് സൈഡില്‍ നിന്ന് കരിങ്കൊടി കാണിക്കും. ഉളുപ്പില്ലായ്മയും രാഷ്ട്രീയ ഉള്ളടക്കമില്ലായ്മയുമാണ് ഇന്നത്തെക്കാലത്തെ സിപിഎമ്മുകാരുടെ മുഖമുദ്രയെന്നും അദ്ദേഹം പറഞ്ഞു.

◾  കേരള കയറ്റുമതി പ്രോത്സാഹന നയം 2025 മന്ത്രിസഭായോഗം അംഗീകരിച്ചു. ഇന്നലെ ചേര്‍ന്ന മന്ത്രിസഭാ യോഗമാണ് കേരള കയറ്റുമതി പ്രോത്സാഹന നയത്തിന് അംഗീകാരം നല്‍കിയത്. ആഗോള കയറ്റുമതി രംഗത്ത് കേരളത്തെ ഒരു പ്രമുഖ കയറ്റുമതി കേന്ദ്രമാക്കുക എന്ന ഉദ്ദേശ്യത്തോടുകൂടിയാണ് കയറ്റുമതി പ്രോത്സാഹന നയം രൂപീകരിക്കുന്നതെന്ന് സര്‍ക്കാര്‍ അറിയിച്ചു. കൂടാതെ ഹൈക്കോടതി പ്ലീഡര്‍മര്‍ക്ക് വേതന പരിഷ്‌കരണം നടപ്പാക്കാനും കായികതാരങ്ങള്‍ക്ക് നിയമനം നല്‍കാനും ഭാസ്‌കര കാരണവര്‍ വധക്കേസിലെ പ്രതി ഷെറിന് ശേഷിക്കുന്ന ശിക്ഷാ കാലയളവ് ഇളവ് ചെയ്ത് അകാലവിടുതല്‍ അനുവദിക്കുന്നതിന് ഗവര്‍ണര്‍ക്ക് ഉപദേശം നല്‍കാനും ഇന്ന് ചേര്‍ന്ന മന്ത്രിസഭാ യോഗം തീരുമാനമെടുത്തിട്ടുണ്ട്.

◾  ലൈംഗിക പീഡന പരാതിയെ തുടര്‍ന്ന് മുന്‍ ഡിവൈഎഫ് ഐ നേതാവും അധ്യാപകനുമായ സുജിത് കൊടക്കാട് നീണ്ട നിര്‍ബന്ധിത അവധിയില്‍ പ്രവേശിച്ചു. നിര്‍ബന്ധിത ദീര്‍ഘകാല അവധിയില്‍ പോകാന്‍ ഉദിനൂര്‍ സെന്‍ട്രല്‍ എയുപി സ്‌കൂള്‍ മാനേജ്മെന്റ് നിര്‍ദ്ദേശിക്കുകയായിരുന്നു. സുജിത് കൊടക്കാടിനോട് വിശദീകരണം തേടാനും സ്‌കൂള്‍ മാനേജ്മെന്റ് കമ്മിറ്റി തീരുമാനിച്ചിട്ടുണ്ട്. ഡിവൈഎഫ്ഐ തൃക്കരിപ്പൂര്‍ ബ്ലോക്ക് സെക്രട്ടറിയായിരുന്ന ഇയാളെ നേരത്തെ സ്ഥാനത്ത് നിന്ന് നീക്കിയിരുന്നു.

◾  കേരളത്തിലെ മുന്നാക്ക സമുദയങ്ങളിലെ സാമ്പത്തികമായി പിന്നാക്കം നില്‍ക്കുന്ന കുടുംബങ്ങളില്‍ നിന്ന് 2024 ജനുവരി ഒന്നിനും ഡിസംബര്‍ 31 നുമിടയില്‍ വിവാഹിതരായ പെണ്‍കുട്ടികളുടെ മാതാപിതാക്കള്‍ക്ക് വിവാഹ ധനസഹായം അനുവദിക്കുന്ന മംഗല്യ സമുന്നതി പദ്ധതിയിലേക്ക് അപേക്ഷ ക്ഷണിച്ചു. ഒരു ലക്ഷം രൂപ വരെ കുടുംബ വാര്‍ഷിക വരുമാനമുള്ള മുന്‍ഗണന എഎവൈ വിഭാഗങ്ങളില്‍ ഉള്‍പ്പെടുന്നവര്‍ക്ക് അപേക്ഷിക്കാം.

◾  പാതയോരത്തെ ബോര്‍ഡുകള്‍ നീക്കം ചെയ്തതിന്റെ പേരില്‍ കണ്ണൂര്‍ പിണറായി ഗ്രാമപഞ്ചായത്ത് ജീവനക്കാര്‍ക്ക് സിപിഎം നേതാക്കളുടെ ഭീഷണി. കയ്യും കാലും വെട്ടുമെന്ന് ഓഫീസില്‍ കയറി ഭീഷണിപ്പെടുത്തിയതില്‍ , ജീവനക്കാര്‍ വാമൂടിക്കെട്ടി പ്രതിഷേധിച്ചു. സിപിഎം ലോക്കല്‍ സെക്രട്ടറി ഉള്‍പ്പെടെയുളളവര്‍ക്കെതിരെയായിരുന്നു മുഖ്യമന്ത്രിയുടെ നാട്ടില്‍ സര്‍ക്കാര്‍ ജീവനക്കാരുടെ പരസ്യപ്രതിഷേധം. ഹൈക്കോടതി ഉത്തരവിനെ തുടര്‍ന്ന് പാതയോരങ്ങളിലെ ബോര്‍ഡുകളും മറ്റും പഞ്ചായത്ത് ജീവനക്കാര്‍ നീക്കം ചെയ്തിരുന്നു. ഇതിനെ തുടര്‍ന്നാണ് സിപിഎമ്മിന്റെ ഭീഷണി .

◾  കുടിവെള്ളത്തില്‍ ബി ജെ പി വിഷം കലക്കിയെന്ന പ്രസ്താവനയില്‍ ദില്ലി മുന്‍ മുഖ്യമന്ത്രിയും എ എ പി ദേശീയ കണ്‍വീനറുമായ അരവിന്ദ് കെജ്രിവാളിനെതിരെ ബി ജെ പി തെരഞ്ഞെടുപ്പ് കമ്മീഷന് പരാതി നല്‍കി. കെജ്രിവാളിനെ തെരഞ്ഞെടുപ്പ് പ്രചരണത്തില്‍ നിന്നും വിലക്കണം എന്നാവശ്യപ്പെട്ടാണ് ബി ജെ പി പരാതി നല്‍കിയത്. ദില്ലിയിലേക്കുള്ള കുടിവെള്ളത്തില്‍ ബി ജെ പി നേതൃത്വം നല്‍കുന്ന ഹരിയാന സര്‍ക്കാര്‍ വിഷം ചേര്‍ക്കുന്നുവെന്ന പ്രസ്താവനയിലാണ് കെജ്രിവാളിനെതിരെ പരാതി ഉയര്‍ന്നിരിക്കുന്നത്.

◾  ഭക്തരായ രണ്ട് പെണ്‍കുട്ടികളെ പീഡിപ്പിച്ച സംഭവത്തില്‍ ശിക്ഷയില്‍ കഴിഞ്ഞിരുന്ന ദേരാ സച്ചാ സൗദ തലവന്‍ ഗുര്‍മീത് സിംഗ് റഹിം സിങ്ങിന് ഇന്നലെ പരോള്‍ അനുവദിച്ചു. 30 ദിവസത്തെ പരോളാണ് ലഭിച്ചത്. ശിക്ഷയില്‍ കഴിയുന്നതിനിടയില്‍ ഇത് 12-ാം തവണയാണ് ഗുര്‍മീതിന് പരോള്‍ ലഭിക്കുന്നത്. ദില്ലിയില്‍ നിയമസഭാ തെരഞ്ഞെടുപ്പ് നടക്കാന്‍ ഒരാഴ്ച ബാക്കി നില്‍ക്കെയാണ് ഗുര്‍മീതിന്റെ പരോള്‍.

◾  ദില്ലി മുഖ്യമന്ത്രി അതിഷി മര്‍ലേനക്കെതിരായി ബി ജെപി നല്‍കിയ അപകീര്‍ത്തിക്കേസ് ദില്ലി കോടതി തള്ളി. ഇ ഡിയുമായി ബന്ധപ്പെട്ട് നടത്തിയ പരാമര്‍ശത്തിലാണ് ബി ജെ പി ദില്ലി മുഖ്യമന്ത്രിക്കെതിരെ പരാതി നല്‍കിയത്. എന്നാല്‍ ഇത് നിലനില്‍ക്കുന്നതല്ലെന്ന് ചൂണ്ടികാട്ടിയ ദില്ലി കോടതി, അപകീര്‍ത്തിക്കേസ് തള്ളിക്കളയുകയായിരുന്നു.

◾  ഉത്തര്‍പ്രദേശിലെ പ്രയാഗ് രാജില്‍ മഹാകുംഭമേളയോടനുബന്ധിച്ച് നടക്കുന്ന ബൃഹദ് തീര്‍ഥാടകസംഗമത്തില്‍ 15 കോടിയോളം പേര്‍ ത്രിവേണിസംഗമത്തില്‍ സ്‌നാനം ചെയ്തതായി റിപ്പോര്‍ട്ടുകള്‍. ജനുവരി 13-നാരംഭിച്ച മഹാകുംഭമേളയിലെ 45 ദിവസം നീണ്ടുനില്‍ക്കുന്ന തീര്‍ഥാടനോത്സവത്തില്‍ ഏകദേശം 45 കോടി ജനങ്ങള്‍ പങ്കെടുക്കുമെന്നാണ് വിലയിരുത്തപ്പെടുന്നത്.  

◾  ബോളിവുഡ് താരം സെയ്ഫ് അലി ഖാനെ കുത്തിയ കേസില്‍ അറസ്റ്റിലായിരിക്കുന്ന മൊഹമ്മദ് ഷെരീഫുള്‍ ഇസ്ലാമിനെതിരെ നിരവധി തളിവുകളുണ്ടെന്ന് പോലീസ്. സെയ്ഫ് അലി ഖാന്റെ വീട്ടില്‍നിന്ന് ലഭിച്ച വിരലടയാളങ്ങള്‍ ഷെരീഫുളിന്റേതുമായി സാമ്യമില്ല എന്ന റിപ്പോര്‍ട്ട് പുറത്തുവന്നതിന് പിന്നാലെയാണ് പാലീസ് ഇക്കാര്യം അറിയിച്ചത്.

◾  ഡല്‍ഹി മുന്‍ മുഖ്യമന്ത്രി അരവിന്ദ് കെജ്രിവാളിനെരൂക്ഷമായി വിമര്‍ശിച്ച് പ്രതിപക്ഷ നേതാവ് രാഹുല്‍ ഗാന്ധി. കെജ്രിവാളിനെ 'മദ്യ അഴിമതിയുടെ സൂത്രധാരനെ'ന്ന് വിശേഷിപ്പിച്ച രാഹുല്‍ ഗാന്ധി കെജ്രിവാള്‍ ചില്ലുകൊട്ടാരത്തിലാണ് താമസിക്കുന്നതെന്ന് പരിഹസിച്ചു. ഡല്‍ഹിയിലെ തിരഞ്ഞെടുപ്പ് റാലിയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

◾  അനധികൃത കുടിയേറ്റത്തെ അനുകൂലിച്ച് കോണ്‍ഗ്രസ് മുതിര്‍ന്ന നേതാവും രാഹുല്‍ ഗാന്ധിയുടെ അടുത്ത അനുയായിയുമായ സാം പിത്രോദ. ഡല്‍ഹി തിരഞ്ഞെടുപ്പിന് ദിവസങ്ങള്‍ക്ക് മുമ്പാണ് പിത്രോദയുടെ വിവാദ പരാമര്‍ശം. ദരിദ്രരും വിശക്കുന്നവരുമായ കുടിയേറ്റക്കാരെ വേട്ടയാടുന്നതിനേക്കാള്‍ ആഗോളതാപനം പോലുള്ള വിഷയങ്ങളില്‍ സര്‍ക്കാര്‍ കൂടുതല്‍ ശ്രദ്ധ കേന്ദ്രീകരിക്കണമെന്ന് പിത്രോദ പറഞ്ഞു.

◾  38-ാമത് ദേശീയ ഗെയിംസിന് ഉത്തരാഖണ്ഡില്‍ തുടക്കം. ഫെബ്രുവരി 14 വരെ നടക്കുന്ന ദേശീയ ഗെയിംസില്‍ 32 ഇനങ്ങളിലായി 10,000 കായികതാരങ്ങളാണ് വിവിധ വേദികളില്‍ മാറ്റുരയ്ക്കുക. പ്രധാനമന്ത്രി നരേന്ദ്രമോദി ഗെയിംസിന്റെ ഉദ്ഘാടനം നിര്‍വഹിച്ചു. 2036ല്‍ രാജ്യം ഒളിമ്പിക്‌സിന് വേദിയാകാനുള്ള പരിശ്രമം നടത്തിക്കൊണ്ടിരിക്കുകയാണെന്ന് പ്രധാനമന്ത്രി ഉദ്ഘാടന സമ്മേളനത്തില്‍ പറഞ്ഞു.

◾  ഐസിസി പുരുഷ ക്രിക്കറ്റര്‍ക്കുള്ള സര്‍ ഗാര്‍ഫീല്‍ഡ് സോബേഴ്‌സ് അവാര്‍ഡ് സ്വന്തമാക്കി ഇന്ത്യന്‍ പേസര്‍ ജസ്പ്രിത് ബുംറ. 2024-ല്‍ ക്രിക്കറ്റിന്റെ വിവിധ ഫോര്‍മാറ്റുകളില്‍ നടത്തിയ പ്രകടനമാണ് ബുംറയെ പുരസ്‌കാരത്തിനര്‍ഹനാക്കിയത്. ഐസിസിയുടെ ഈ പുരസ്‌കാരം സ്വന്തമാക്കുന്ന അഞ്ചാമത്തെ ഇന്ത്യന്‍ താരവും ആദ്യ ഇന്ത്യന്‍ പേസര്‍കൂടിയാണ് ബുംറ.

◾  ഇംഗ്ലണ്ടിനെതിരായ മൂന്നാം ടി20യില്‍ ഇന്ത്യക്ക് 26 റണ്‍സിന്റെ തോല്‍വി. ഇംഗ്ലണ്ട് ഉയര്‍ത്തിയ 172 റണ്‍സ് വിജയലക്ഷ്യം പിന്തുടര്‍ന്ന ഇന്ത്യക്ക് നിശ്ചിത ഓവറില്‍ ഒമ്പത് വിക്കറ്റ് നഷ്ടത്തില്‍ 145 റണ്‍സെടുക്കാനേ സാധിച്ചുള്ളു. 40 റണ്‍സെടുത്ത ഹാര്‍ദിക് പാണ്ഡ്യയാണ് ഇന്ത്യയുടെ ടോപ് സ്‌കോറര്‍.  നേരത്തെ വരുണ്‍ ചക്രവര്‍ത്തിയുടെ അഞ്ച് വിക്കറ്റ് പ്രകടനമാണ് ഇംഗ്ലണ്ടിനെ മികച്ച സ്‌കോര്‍ നേടുന്നതില്‍ നിന്നും നിയന്ത്രിച്ചു നിര്‍ത്തിയത്. പരമ്പരയിലെ മൂന്ന് മത്സരങ്ങളിലും മികച്ച പ്രകടനം കാഴ്ച വെക്കാന്‍ സാധിക്കാത്ത സഞ്ജു സാംസണ്‍ മൂന്ന് മത്സരങ്ങളിലും ജോഫ്ര ആര്‍ച്ചര്‍ക്ക് വിക്കറ്റ് നല്‍കിയാണ് മടങ്ങിയത്.

◾  രാജ്യത്തെ ബാങ്കുകളില്‍ പണലഭ്യത ഉറപ്പാക്കാന്‍ അടുത്ത ഒരു മാസത്തിനുള്ളില്‍ മൂന്നു ഘട്ടങ്ങളിലായി റിസര്‍വ് ബാങ്ക് ഇടപെടലുകള്‍ നടത്തും. ആദ്യ ഘട്ടത്തില്‍ ഓപ്പണ്‍ മാര്‍ക്കറ്റ് ഓപ്പറേഷനിലൂടെ 60,000 കോടി രൂപയുടെ ഗവണ്‍മെന്റ് സെക്യൂരിറ്റുകളുടെ വില്‍പ്പനയാണ് നടക്കുക. ഈ സാമ്പത്തിക വര്‍ഷം അവസാനിക്കുന്നതിന് മുമ്പ് മൂന്നു ഘട്ടങ്ങളിലുള്ള സാമ്പത്തിക ഇടപെടലുകളാണ് റിസര്‍വ് ബാങ്ക് പ്രഖ്യാപിച്ചത്. ജനുവരി 30, ഫെബ്രുവരി 13, ഫെബ്രുവരി 20 എന്നീ തീയതികളില്‍ നടക്കുന്ന സര്‍ക്കാര്‍ സെക്യൂരിറ്റികളുടെ ലേലത്തിലൂടെ 60,000 കോടി രൂപയാണ് സമാഹരിക്കാന്‍ ലക്ഷ്യമിടുന്നത്. രണ്ടാം ഘട്ടത്തില്‍ 56 ദിവസത്തെ വേരിയബിള്‍ റേറ്റ് റിപ്പോ ലേലം ഫെബ്രുവരി 7 ന് നടക്കും. 50,000 കോടിയുടെ വിജ്ഞാപനമാണ് നടത്തുന്നത്. ജനുവരി 31 ന് 500 കോടി ഡോളറിന്റെ സ്വാപ് ലേലവും റിസര്‍വ് ബാങ്ക് പ്രഖ്യാപിച്ചിട്ടുണ്ട്.

◾  മലയാളത്തില്‍ ഒട്ടേറെ സൂപ്പര്‍ ഹിറ്റ് ചിത്രങ്ങള്‍ നിര്‍മ്മിച്ച ബാനറായ ഗുഡ്വില്‍ എന്റര്‍ടെയ്ന്‍മെന്റ്സ്, അടുത്തിടെ സൂപ്പര്‍ ഹിറ്റായ ആസിഫ് അലി ചിത്രം 'കിഷ്‌കിന്ധാ കാണ്ഡ'ത്തിന് ശേഷം നിര്‍മ്മിക്കുന്ന പുതിയ ചിത്രമായ 'നാരായണീന്റെ മൂന്നാണ്മക്കള്‍' ഒഫീഷ്യല്‍ ട്രെയിലര്‍ പുറത്തിറങ്ങി. മമ്മൂട്ടിയാണ് ട്രെയിലര്‍ മമ്മൂട്ടി കമ്പനിയുടെ പേജിലൂടെ പുറത്തിറക്കിയിരിക്കുന്നത്. ഹൃദയം തൊടുന്ന കഥയും കഥാപാത്രങ്ങളുമായാണ് ചിത്രം എത്തുന്നതെന്ന് സമര്‍ത്ഥിക്കുന്നതാണ് ട്രെയിലര്‍. ശരണ്‍ വേണുഗോപാല്‍ രചനയും സംവിധാനവും നിര്‍വ്വഹിക്കുന്ന ചിത്രത്തില്‍ ജോജു ജോര്‍ജ്, സുരാജ് വെഞ്ഞാറമൂട്, അലന്‍സിയര്‍ ലോപ്പസ് എന്നിവരാണ് പ്രധാന കഥാപാത്രങ്ങളായെത്തുന്നത്. ചിത്രം ഫെബ്രുവരി 7ന് തിയേറ്ററുകളിലെത്തും.  തോമസ് മാത്യു, ഗാര്‍ഗി ആനന്ദന്‍, ഷെല്ലി എന്‍ കുമാര്‍, സജിത മഠത്തില്‍, സരസ ബാലുശ്ശേരി തുടങ്ങിയവരാണ് ചിത്രത്തിലെ മറ്റ് പ്രധാന അഭിനേതാക്കള്‍. കൊയിലാണ്ടിയിലെ പുരാതനവും പ്രൗഡവുമായ ഒരു കുടുംബത്തിലെ നാരായണിയമ്മയുടെ മൂന്നാണ്മക്കളെ കേന്ദ്രീകരിച്ചാണ് ചിത്രം അവതരിപ്പിച്ചിരിക്കുന്നത്. സുരാജ് വെഞ്ഞാറമൂടാണ് ഇളയമകനായി ചിത്രത്തില്‍ എത്തുന്നത്.

◾  വിനീത് ശ്രീനിവാസന്‍, നിഖില വിമല്‍ എന്നിവരെ പ്രധാന കഥാപാത്രങ്ങളാക്കി എം മോഹനന്‍ സംവിധാനം ചെയ്ത 'ഒരു ജാതി ജാതകം' എന്ന ചിത്രത്തിന്റെ ട്രെയ്ലര്‍ പുറത്തെത്തി. കോമഡിക്ക് പ്രാധാന്യമുള്ള ചിത്രം വിവാഹം ആലോചിക്കുന്ന ഒരു യുവാവിന്റെ കഥയാണ് പറയുന്നത്. നടനായി മുന്‍പും തിയറ്ററുകളില്‍ പൊട്ടിച്ചിരി തീര്‍ത്തിട്ടുള്ള വിനീത് ശ്രീനിവാസന്റെ വേറിട്ട പ്രകടനമായിരിക്കും ചിത്രത്തിലേതെന്ന് ട്രെയ്ലര്‍ പറയുന്നു. ബാബു ആന്റണി, പി പി കുഞ്ഞികൃഷ്ണന്‍, മൃദുല്‍ നായര്‍, ഇഷ തല്‍വാര്‍, വിധു പ്രതാപ്, സയനോര ഫിലിപ്പ്, കയാദു ലോഹര്‍, രഞ്ജി കങ്കോല്‍, അമല്‍ താഹ, ഇന്ദു തമ്പി, രഞ്ജിത മധു, ചിപ്പി ദേവസ്യ, വര്‍ഷ രമേശ്, പൂജ മോഹന്‍രാജ്, ഹരിത പറക്കോട്, ഷോണ്‍ റോമി, ശരത്ത് ശഭ, നിര്‍മല്‍ പാലാഴി, വിജയകൃഷ്ണന്‍, ഐശ്വര്യ മിഥുന്‍ കൊറോത്ത്, അനുശ്രീ അജിതന്‍, അരവിന്ദ് രഘു തുടങ്ങിയവരാണ് മറ്റു താരങ്ങള്‍. രാകേഷ് മണ്ടോടി തിരക്കഥ, സംഭാഷണം എഴുതുന്നു.

◾  ദക്ഷിണ കൊറിയന്‍ വാഹന ബ്രാന്‍ഡായ കിയ 2024-ല്‍ കിയ ഇന്ത്യ 2,45,000 യൂണിറ്റുകള്‍ വിറ്റു. ഇത് കമ്പനിയുടെ ആഗോള വില്‍പ്പനയുടെ 7.93% വരും. 2024-ല്‍ കമ്പനിയുടെ മൊത്തം വില്‍പ്പനയുടെ 46.5% വിപണി വിഹിതവും കിയ സെല്‍റ്റോസ് മാത്രം കൈവരിച്ചു. 2019 ഓഗസ്റ്റില്‍ ലോഞ്ച് ചെയ്തതിനുശേഷം 5.20 ലക്ഷം യൂണിറ്റുകള്‍ വിറ്റഴിച്ചു. 2024-ല്‍ ഒരു ലക്ഷത്തിലധികം സോനെറ്റ് എസ്യുവികള്‍ വിറ്റു. ഇതോടൊപ്പം കാരെന്‍സിന്റെ വില്‍പ്പനയും രണ്ട് ലക്ഷത്തിന് അടുത്താണ്. 2024 ലെ കിയയുടെ ഇന്ത്യയിലെ വില്‍പ്പന റിപ്പോര്‍ട്ട് അനുസരിച്ച്, സോനെറ്റ് 1,06,690 യൂണിറ്റ് വില്‍പ്പന കൈവരിച്ചു. ഇതോടെ 11-ാം സ്ഥാനം കരസ്ഥമാക്കി. 73,745 യൂണിറ്റ് വില്‍പ്പനയുമായി സെല്‍റ്റോസ് 17-ാം സ്ഥാനത്തെത്തി. അതേസമയം, 63,674 യൂണിറ്റ് വില്‍പ്പനയുമായി 7 സീറ്റര്‍ കാരന്‍സ് 18-ാം സ്ഥാനത്തെത്തി. 2024 ഏപ്രില്‍-ഡിസംബര്‍ കാലയളവില്‍ കിയ ഇന്ത്യ 1,79,631 യൂട്ടിലിറ്റി വാഹനങ്ങള്‍ വിറ്റു. അതിന്റെ വിപണി വിഹിതം 8.76% ആയിരുന്നു. ഇതില്‍ സോനെറ്റ് (77,308 യൂണിറ്റ്), സെല്‍റ്റോസ് (53,177 യൂണിറ്റ്), കാരന്‍സ് (48,257 യൂണിറ്റ്), കാര്‍ണിവല്‍ (599 യൂണിറ്റ്), ഇവി6 (290 യൂണിറ്റ്) എന്നിവയുടെ വില്‍പ്പന ഉള്‍പ്പെടുന്നു. അതേസമയം 2025 ഫെബ്രുവരി 1-ന് അവതരിപ്പിക്കാന്‍ പോകുകയാണ് കിയ.

◾  കാലം ആവശ്യപ്പെടുന്നതും കാലാതീതമാകുന്നതുമായ കഥനങ്ങളുടെ ലോകം. മനുഷ്യാനുഭവങ്ങളുടെ ആന്തര വൈരുധ്യങ്ങള്‍, സ്‌ത്രൈണസത്തയുടെ ഭാഗധേയങ്ങള്‍, മിതവും സാരവത്തായതുമായ വൈയക്തി കാനുഭവങ്ങള്‍... മലയാളകഥയുടെ പുതിയ ലോകങ്ങള്‍. സി.വി. ബാലകൃഷ്ണന്റെ ആഖ്യാനകലയുടെ പുതിയ ദിശകള്‍. സവിശേഷ കഥാസമാഹാരം. 'താദാത്മ്യം'. ഡിസി ബുക്സ്. വില 135 രൂപ.

◾  ആരോഗ്യത്തിന് നല്ലതല്ലെന്ന് കരുതി മാറ്റിവെച്ച ചോക്ലേറ്റും ചീസും വൈനും നിങ്ങളുടെ ആയുര്‍ദൈര്‍ഘ്യം വര്‍ധിപ്പിക്കുമെന്ന് പഠനം. ജേര്‍ണല്‍ ഓഫ് അല്‍ഷ്യമേഴ്‌സ് ഡിസീസില്‍ പ്രസിദ്ധീകരിച്ച പഠനത്തില്‍ ദിവസവും ഇവ മിതമായ അളവില്‍ കഴിക്കുന്നത് തലച്ചോറിന്റെ ആരോഗ്യം മെച്ചപ്പെടുത്താനും ആയുര്‍ദൈര്‍ഘ്യം വര്‍ധിപ്പിക്കാനും സഹായിക്കുമെന്ന് കണ്ടെത്തി. 1787 പേരുടെ വിവരങ്ങളെ അടിസ്ഥാനപ്പെടുത്തി 10 വര്‍ഷമാണ് ഗവേഷകര്‍ പഠനം നടത്തിയത്. റെഡ് വൈന്‍, ചീസ്, ചോക്ലറ്റ് പോലുള്ളവ അനാരോഗ്യകരമായ ഭക്ഷണങ്ങളുടെ പട്ടികയിലാണ് പൊതുവെ ഉള്‍പ്പെടുത്തുക. എന്നാല്‍ ഇവയുടെ മിതമായ ഉപഭോഗം ഹൃദയാരോഗ്യവും തലച്ചോറിന്റെ ആരോഗ്യവും മെച്ചപ്പെടുത്താന്‍ സഹായിക്കുമെന്ന് ഗവേഷകര്‍ ചൂണ്ടിക്കാണിക്കുന്നു. ദിവസവും ഡാര്‍ക്ക് ചോക്ലേറ്റ് 12 ഗ്രാം വീതം കഴിക്കുന്നത് ഹൃദ്രോഗ സാധ്യതയും 12 ശതമാനം വരെ അതു സംബന്ധിച്ചുള്ള മരണസാധ്യത കുറയ്ക്കുമെന്ന് യുഎസ് നാഷണല്‍ കാന്‍സര്‍ ഇന്‍സ്റ്റിറ്റ്യൂട്ട് 2022ല്‍ നടത്തിയ പഠനത്തില്‍ പറയുന്നു. റെഡ് വൈന്‍ ശരീര വീക്കം കുറയ്ക്കുന്നതിലൂടെയും രക്തക്കുഴലുകളെ സംരക്ഷിക്കുന്നതിലൂടെയും ഹൃദയ സംബന്ധമായ ക്ഷേമം മെച്ചപ്പെടുത്തുന്നതിനും അതിലൂടെ രക്തപ്രവാഹ സാധ്യത കുറയ്ക്കാനും സഹായിക്കും. റെഡ് വൈന്റെ മിതമായ ഉപഭോഗം കൊളസ്ട്രോള്‍ ക്രമീകരിക്കാനും ഹൃദയാരോഗ്യം മെച്ചപ്പെടുത്താനും സഹായിക്കും. ചീസില്‍ പ്രോട്ടീന്‍, കാത്സ്യം, ഫോസ്ഫറസ്, ബി12, കെ2 പോലുള്ള അവശ്യ പോഷകങ്ങള്‍ അടങ്ങിയിട്ടുണ്ട്. ഇത് എല്ലുകളുടെ ആരോഗ്യവും ഹൃദയാരോഗ്യവും മെച്ചപ്പെടുത്താനും വൈജ്ഞാനിക കഴിവുകളെ മെച്ചപ്പെടുത്താനും സഹായിക്കും. കൂടാതെ ആരോഗ്യകരമായ കുടല്‍ ബാക്ടീരിയകളെ ബാലന്‍സ് ചെയ്യുന്നതിന് പ്രോബയോട്ടിക്കുകള്‍ ചീസില്‍ അടങ്ങിയിട്ടുണ്ട്.

➖➖➖➖➖➖➖➖